Joh 16 | WSK | STEP | “Nina nengemang ningi nunguning waral bore ko, ani girem ale mel suen la imitang ninga manem se ikiman.

John 16

1 “Nina nengemang ningi nunguning waral bore ko, ani girem ale mel suen la imitang ninga manem se ikiman. 2 Nina synagogue ningi namaral, mu nuna ninga karomonkowo. Bare mu la mena. Tom saki te ninga momon se kueral se balmon, ‘Ana Kaem ko ura nunguning diram betesan,’ ma balmonko. ^{▼▼John 16:2 Tom nu me giris palaga la Paul butata bitakaso: 1 Tim 1:13.} 3 Nuna butata ninga betemonko, mu awuk, nuna aninga Ait me ko ikisan, ale ani me aga ikisan tala. 4 Bare ani girem ninga manorsam mu ko duap iwita: tom nuna kilek memek mu ningimik te betemon, mu nina ikialko, ‘O anananga Kari Biya giram nanga maonam wore ko nunguning aratosowo,’ malko.

Korang Bur ko ura

“Ani duap te nengerak baga se mel imi ko me ninga manem. 5 Bare ani ninga bitirik ale Kari aga beteram se tairem mu kote namirikko se ninga manorsam. Bare ninga ningi bo ani apareyate namirikko mu ko me aga isarso. 6 Ani ninga bitirikko balem se nina ko nengemang batagoso. 7 Bare ani den nunguning ninga manorsam, ani ninga bitirik ale namirik mu terong. E ani me ninga bitirik ale namirik, mu Saonga Kari sokel ningarukko mu nengete me tairukko. Bare ani namirik asele nu bitirik se nengete tai kapurukko.

8 “Ali imi ko kariimet nunga ikia, nunga bagara diram mena. Se Korang Bur tai kapuruk ale diram nunga kausok se anapeya kilek memek, se anapeya bagara diram se anapeya tutera diram mu ko ikimonko. (As was: TH NLT the coming judgment: Aking tutera kam ko nunga manuk se ikimonko.) 9 Nu iwita nunga kausokko: nuna ani ago ko me nongomang ningi nunguning aram umutang nononga ikup memek. ^{▼▼John 16:9 Nononga ikup memek: John 3:18.} 10 Se aking ani pelerik aga Ait kote namirik se me agarkal mu te ali imi ko kariimet ikimon, aninga bagara Kaem koma te diram mu ikimonko. ^{▼▼John 16:10 Jesus ko bagara Kaem koma te diram: Acts 5:31; Rom 1:4.} (Korang Bur butata nunga kausokko. 11 Se aking ali imi te ko supuling ^{▼▼John 16:11 Jesus Satan ko baluwoso. Satan se ko kariimet memek tamonko: Rev 20:10-15.} mu noko memek koma Kaem yaman ikup tuokko balam, mu Korang Bur agotala kariimet nunga kausokko.

12 “Aningate den suen biya tala ani ninga manikko, bare ani aitakta ninga manikko me terong, mu awuk, den mu ani ninga manik se ikial mu nina ikup ninga moruk se nengemang bataguk bore ko. 13 Bare Korang Bur, Den Nunguning Bala ko Kari, mu tai kapuruk ale den nunguning suen biya ninga kausok se duap ninguru ikialko. Mu nu kota ko ikia te den me ninga manuk, mu nu den ikiok mu la ninga manuk, ale munan mel udagi aratukko mu ko ninga kausokko. ^{▼▼John 16:13 Korang Bur mu anananga Kausa Kari: 1 John 2:27.} 14 Nu aningate ikia den nunguning ikiok, ale nina ninga manuk, ale te ani aip biya aisukko. 15 Mu mel suen biya Ba kote aniso mu aninga karogo. Buta se ani balem, Korang Bur aningate ikia den nunguning tauk ale ninga manukko balem.

Nengemang ikup mu geraguk amilmilurukko

16 “Tom maiya mena nina ani agarkalko, se tom mu menaruk mu nina me ani agarkalko. Ale udagi tom maiya mena tala baga aking agarkalko.”

17 Jesus buta balam se ko olekem sang nunumi isarukasan, “Tom katir la me aringinakko maso, ale baga tom katirta tala aringinakko maso, bare ko duap awuk? Nu balso noko Nuet kote namoso maso. 18 ‘Tom maiya mena’ maso, bare awuk ko wore uwuta balso? Ana noko den balso mu ko nunguning me ikisan.”

19 Jesus nu ikiam, mel mu ko nu isarmonko kaeman wore ko ikiam. Se nu nunga maonam, “Ani balem, ‘Tom maiya mena nina ani agarkalko, se tom mu menaruk mu nina me ani agarkalko. Ale baga tom maiya mena tala baga aking agarkalko,’ ma balem. Se ko nengeta ninimi isaruwasan e? 20 Ani nunguningta ninga manorsam, ani kuerik se nina nengemang ninguru bataguk se niaralko, bare ali imi ko kariimet mu amilmilomonko. Bare udagi te (ani barasik se) nenenga nengemang bataga mu geraguk amilmil biya nengemang te tairukko. 21 Tom imet kuriang iluwokko pingi aso, mu nu kumik yaman ninguru ikiso. Bare tom nu kuriang bilangoso, mu nu udagi kumik yaman ikia mu ko ikia bo me taso. Mu awuk, noko kuriang iluwam se bagoso se gomang amilmil ninguru taiso. 22 Mu turantala, aitak nenengate nengemang bataga ikup aniso. Bare udagi te ani ningarkik se nina ani agarkal mu te ninguru amilmilaralko. Se nenenga amilmil mu kari bo menawurokko me terong, nenenga amilmil mu tom suen biya butata anirukko. ^{▼▼John 16:22 Olekem alo Jesus aringimon ale amilmilomonko: John 20:20.}

23 “Tom mu tairuk mu nina isa bo ani me aisalko. Ani nunguningta ninga manorsam, nina anapeya ko kueral ale aninga aip te aga Ait aru maonal, mu ningarukko. 24 Tom ani nengerak bagerem tai aitakta mu nina mel bo ko aninga aip te aga Ait me aru manorman. Bare aitak ani ninga manorsam, aninga aip te am ko balal ale talko, ale nengemang ningi amilmil biyala tairukkowo.

Jesus ali imi ko munan suen biya kiaram

25 “Den ani ninga manaru lagakasam mu den ira te. Bare udagi tom tairuk mu te ani den ira bo me aking ninga manikkowo, mena, mu aninga Ait ko wetang te balik se ikialko. 26 Tom mu te nina aninga aip te diram aga Ait te aru ngatongalko. Se ani me ninga manorsam ani nu manik se nenenga sangukko ma me balsam. 27 Mena. Mu aninga Ait kota nenenga kueso, mu awuk, nina aninga kuesan ale ani nu ilak baga tairem mu ko nengemang ningi nunguning aram se. 28 Ulengkala aninga Ait ilak baga beterem ale ali imi te tai kaperem. Bare aitak mu ani ali imi bitirik ale pelerik aga Ait kote namirikko.”

29 Jesus den mu balam se ko olekem nu manorman, “Aitak ni den me eresam, wetang te la balsam se ana ikisan. 30 Se aitak ana ikisan, ni kari bo isa kisok se te den koma baluko me kimi betesam, mu ni mel suen biya ko iki saperem. Se ana nika nangamang ningi nunguning aram, ni Kaem ilak baga tairem.” ^{▼▼John 16:30 Jesus mu nunga isa nongomang te mu ari saparam: John 2:24-25. Matthew 6:8 ago arikko.}

31 Olekem butata balman se Jesus nunga maonam, “Se nina aitakta nengemang ningi nunguning aram e? 32 Tom pingi aram se aratuk mu nina aninga beteral nagural parasaral ale ninga wonong wonong namaralko. Aninga beteralkowo, se ani agata suwanta diram bagirikko. Bare ani agata me bagirikko, aninga Ait agarak bagoso se. ^{▼▼John 16:32 Kaem tom suen biya Jesus ilak bagakaso: John 8:29.} Aninga angamang nina ani te nengemang lila te bagaralko, borta ko se ani den imi ninga manem. Ali imi ko kariimet nina ikup ningarmonkowo! Bare me nguangaralko, sokel ago bagaralko! Mu awuk, ali imi ko munan suen biya ani kia saperem.”

33